Бастауыш партия ұйымдарының қызметін жандандыру мақсатында форум өтті
14-15 қараша күндері Астанада өткен «Нұр Отан» партиясының бастауыш ұйымдарының республикалық форумында Жуалылық бастауыш партия ұйымы үздіктер қатарынан көрінді. Форумның басты мақсаты – бастауыш партия ұйымдарының қызметін жандандырудың тиімді жолдары мен тетіктерін талқылау. Өздеріңізге белгілі болып отырғандай, Елбасы бізге партия қызметін жүйелі түрде жаңғыртуды тапсырды. Бастауыш партия ұйымдарының тиімділігін арттыру – сол жұмыстың басты бағыттарының бірі. Жалпы бастауыш партия ұйымдары жергілікті жерлерде партия саясаты мен оның стратегиялық міндеттерін жүзеге асырып, халықпен және әр нұротандықпен етене жұмыс істейтін партиялық құрылым. Бүгінде партияның 6 мыңға жуық бастауыш ұйымы бар. Ал Жамбыл облысында қазіргі таңда партияның 337 бастауыш ұйымы болса, оларда жалпы саны 70 мыңға жуық мүше бар.
Алғаш рет ұйымдастырылған іс-шараға еліміздің барлық өңірінен 600-ден астам делегат қатысты. Оның ішінде партия облыстық филиалы төрағасының бірінші орынбасары Ерқанат Манжуов бастаған 20-дан аса делегатта бар.
Форумның бірінші күні панельді сессия өтіп, онда бастауыш ұйымдардың жұмыс тиімділігінің көрсеткіштері жан-жақты талқыланды. Екінші күні алғаш рет ұйымдастырылған «Нұр Отан» партиясы бастауыш ұйымдарының қорытынды жиыны өтіп, делегаттар пленарлық отырысқа қатысты.
Іс-шара барысында «Нұр Отан» партиясы төрағасының бірінші орынбасары Мәулен Әшімбаев Елбасы партия Төрағасының құттықтау сөзін оқып, Мемлекет басшысының форум қатысушыларына арнаған ыстық ықыласын жеткізді.
Сондай-ақ, форумда бастауыш партия ұйымдарының қызметін жандандыру тұжырымдамасы мақұлданып, алдағы басым бағыттар анықталды және «Үздік бастауыш партия ұйымдары» республикалық байқауының жеңімпаздары марапатталды.
Байқаудың облыстық кезеңінде Жуалы ауданынан «Бауыржан Момышұлы», Т.Рысқұлов ауданынан «Жарлысу», Талас ауданынан «Шолақтау» бастауыш партия ұйымдары жеңімпаз атанып, республикалық кезеңге жолдама алған болатын. Осымен төртінші мәрте ұйымдастырылған байқауға биыл 2000-нан аса БПҰ қатысып, үш санат бойынша бақ сынады. Нәтижесінде, 500-ден астам мүшесі бар бастауыш партия ұйымдарының арасынан Жуалы ауданынан «Бауыржан Момышұлы» БПҰ үздіктер қатарынан көрініп, 500 мың теңге жүлдемен марапатталды.
