ШЫМКЕНТТЕГІ ЖІП ИІРУ ФАБРИКАСЫ ЖҰМЫСЫН ҚАЙТА ЖАҢҒЫРТТЫ
Шымкент қаласында жұмысы тоқтап тұрған жіп иіру фабрикасы қайта іске қосылды. Бұл жұмыстар Елбасы Н.Ә.Назарбаевтың «Қарапайым заттар экономикасы» жобасы аясында жүзеге асты. Ал өзбекстандық инвесторлар фабрикаға бірқатар жөндеу-қалпына келтіру жұмыстарын жүргізіп, оның қайта іске қосылуын қамтамасыз етті.
Аталған өндіріс ошағының ашылуына ҚР Премьер-Министрі А.Мамин, Шымкент қаласының әкімі Е.Айтаханов пен Өзбекстанның «Alliance Textile» ЖӨКҚ директорлар кеңесінің төрағасы И.Эгамбердиев қатысты.
Іске қосылған жіп иіру фабрикасында 120 жұмыс орнын ашып, жылына 6000 тонна мақта талшығын өңдеуді көздеп отыр. Көршілес Өзбекстан Республикасының инвесторлары тарапынан құйылатын инвестицияның жалпы көлемі шамамен 4,6 млрд теңгені құрайды.
Аталған фабриканы іске қосу Шымкентте тоқыма кластерін қалпына келтіру Жол картасының бірінші кезеңі саналады. Биыл Оңтүстікте өндірілетін мақтаның 20 пайызын қамтыса, келер жылы 50 пайызға жеткізу жоспарлануда. Жалпы тоқыма кластерін қалпына келтіру бойынша жасалған Жол картасының негізгі мақсаты — өңірде өндірілетін мақтаның 100 пайызын қамту. Оңтүстікте өндірілетін мақтаның барлығын толығымен Шымкент қаласында өңдеу, ол — үшінші мегаполистің экономикасын дамыту жолындағы ауқымды жұмыстардың бірі саналады.
Шымкент қаласы әкімінің баспасөз қызметі
