Өзіндік құнын ақтайды
Бүгінде Түркістан облысында жылыжайлардың қатары артып келеді. Бұл өз кезегінде жыл бойы көкөніспен қамтамасыз етуге септігін тигізеді. Еліміз бойынша жылыжайларлардың 60 пайызы Түркістан облысының еншісінде. Яғни, облыс бойынша жылыжай көлемі 1325 гектар болса, оның басым бөлігі – 633 гектары Сарыағаш ауданында, деп хабарлайды «Егемен Қазақстан» газеті. Ал біздегі 1325 гектар жылыжайдың 100 гектарында ғана көшет, гүл өсіріледі, яғни негізгі егетініміз қияр мен қызанақ. Оңтүстікте жылыжайлардың жұмысы, өнімдерін тасымалдау, өткізу мәселесі бір жүйеге қойылған. Әр жылыжайдың өз тұтынушысы бар, алдын ала тапсырыс берушілер де аз емес. Түсетін табысы да қомақты. Мысалы, фермерлік жылыжайда 1 гектар қияр егуге кететін шығын есеп бойынша 28,0 млн теңге. Бір гектардан 150 тонна өнім алғанда, өзіндік құны 186 теңге болады. Кәсіпкер көтерме бағамен 220 теңгеден бергеннің өзінде 36 млн теңге табыс түседі. Оған 2 айналым берілетін 3 млн теңге субсидияны қосыңыз, сонда жылыжай иесінің таза табысы 8 млн теңгеге жетеді. Жылыжай өзін 5 жылда ақтайды деп есептелген, бірақ 2,5-3 жылда ақтайды. Ал гектарынан 450 тонна өнім алып, 51,2 млн теңге табыс түсіретін өндірістік жылыжай өзін екі жылда ақтайды. Ал субсидияның берілуі де кәсіпкерге үлкен қолдау, Жылыжайға коммуналдық қызметтер бағасының ықпалы жоқ», дейді облыстық ауыл шаруашылығы басқармасы ауылшаруашылық өнімдерін өңдеу, инновациялық жетістіктерді қолдау және мақта саласын дамыту бөлімінің бас маманы Тайжан Мырзазия.
