Квазимемлекеттік сектор субъектілеріне заң талаптарын сақтаудың маңыздылығы түсіндірілді
Бүгін Департаменттің бас маманы Гүлмира Төлегенқызы мен «Ұлттық ақпараттық технологиялар» акционерлік қоғамының Түркістан облысы бойынша өкілдігі қызметкерлерінің қатысуымен семинар кеңес өтті.
Шараның негізгі мақсаты — өңірдегі квазимемлекеттік және жеке сектор ұйымдарда ұжымдық адалдық стандарттарын сақтау бойынша ақпараттық және ағарту жұмыстарын жүргізу.
Жиында Г.Төлегенқызы 2022-2026 жылдарға арналған сыбайлас жемқорлыққа қарсы саясат тұжырымдамасымен таныстырып, стратегиялық құжаттың маңызды аспектілерін түсіндірді.
Сондай-ақ, Тұжырымдамада негізсіз баюға жауапкершілік енгізілгенін, онда жемқорлыққа қарсы саясатты дамыту, парасатты қоғам қалыптастыру, жемқорлықты азайту, жазаның бұлтартпастығын күшейту, азаматтық қоғамды тарту және тағы басқа маңызды мәселелер қамтылғанын атап өтіп, жемқорлық құқықбұзушылықтары мен қылмыстарына қатысты енгізілген жауапкершіліктің қатаңдатылғанын жеткізді.
Бұдан бөлек, ҚР «Сыбайлас жемқорлыққа қарсы іс-қимыл туралы» Заңында «Сыбайлас жемқорлыққа қарсы іс-қимылды өз құзіреті шегінде барлық мемлекеттік органдар, ұйымдар, квазимемлекеттік сектор субъектілері мен лауазымды адамдар жүргізуге міндетті» екенін тілге тиек етіп, ұжым қызметкерлерін сыбайлас жемқорлық тәуекелдерінің алдын алуда жұмыла жұмыс жасауға шақырды.
Шара соңында жиынға қатысушылар тақырып аясында бірқатар сауалдарын жолдап, өзара пікір алмасты.
