Ж. Түймебаев түркістандықтарды қолжетімді баспанамен қамтамасыз етуді тапсырды
Бүгін Түркістан облысының әкімі Жансейіт Түймебаев «Тұрғын үй құрылыс жинақ банкі» АҚ-ның Оңтүстік филиалы директоры Құдайберген Сейтмамбетовпен кездесті. Жүздесуде «Нұрлы жер» мемлекеттік тұрғын үй бағдарламасының бағыттарының бірі — кредиттік тұрғын үй құрылысын дамыту мәселелері қаралып, қолжетімді баспана мәселесін шешу жағдайлары сөз болды.
Аталған банктің өңіріміздегі жетекшісі саладағы атқарылған бірқатар жұмыстардың барысын баяндап, алдағы жоспарларымен бөлісті. Атап айтқанда, бүгінгі таңда «Тұрғын үй құрылыс жинақ банкі» АҚ-ның Оңтүстік филиалы «Баспана» мекемесімен қол қою шараларын жүргізуде. 2018 жылдың 1 желтоқсаннан бастап банк ұжымы Елбасы бекіткен «7-20-25» бағдарламасы бойынша тиісті жұмыстарды іске асыра бастайды.
Сонымен бірге, басқосуда Қ.Сейтмамбетов әкімге облыс тұрғындары үшін өте тиімді де, ыңғайлы болатын ұсынысын жеткізді. Алғашқы салымсыз-ақ, баспаналы болуға болатын жобада қарапайым халықтың жағдайы ескерілген. Мұнан бөлек, әкімдік тарапынан тұрғын үй құрылыс жинақ жүйесі бойынша түсіндіру жұмыстарын жүргізуде қолдау көрсетуді сұрады.
Осынау ұсыныс, тілектерге қаныққан аймақ басшысы, ең бастысы, баспаналардың қолжетімді болуы қажеттігін айтып, «7-20-25» бағдарламасын өңірімізде мықтап қолға алу үшін түсіндірме жұмыстарын кеңінен жүргізуді тиісті басқарма басшыларына тапсырды.
Осы жылы «7-20-25» бағдарламасын облыста іске асыру мақсатында, Түркістан қаласында жеке салушы және «Түркістан» ӘКК» АҚ-ы арқылы 6 көпқабатты тұрғын үйдің (288 пәтер, 15,6 мың ш.м.) құрылысы басталған болатын. Бұл пәтерлерді 2019 жылы пайдалануға тапсыру жоспарланып, барлық үйлерді «7-20-25» бағдарлама арқылы тарату көзделуде.
«7-20-25» бағдарламасы арқылы салынған тұрғын үйлерді тарату Түркістан облысының энергетика, тұрғын үй-коммуналдық шаруашылық басқармасы арқылы жүргізіледі.
Сонымен қатар, «Тұрғын үй құрылыс жинақ банкі» АҚ-ы басшылығының мәліметіне сәйкес 2019 жылы Түркістан облысының орталығы — Түркістан қаласынан банктің облыстық филиалы ашылатын болады.
Түркістан облысы әкімінің баспасөз қызметі
