ЖҮРЕККЕ ОТ БЕРГЕН ҚОЙЫЛЫМ
Ахмет Ясауи университетінде өтіп жатқан «ҚАЗАҚ ТІЛІ – ҒЫЛЫМ ТІЛІ: ЖАСАНДЫ ИНТЕЛЛЕКТ ЖӘНЕ ТЕРМИНОЛОГИЯ» ІІ халықаралық симпозиумының 1-күні өте сәтті түйінделді. Алда тағы екі күн ғалымдар пікір алмасады.
Бүгінгі ғылыми жиын «МЫҢ ЗАМАН — БІР ТҮРКІСТАН» музыкалық спектаклімен қорытындыланды. Дәл осы жерде ерекше акцент бергім келеді, пьеса авторы Ахмет Ясауи университетінің түлегі, журналист Сандуғаш Баймаханқызы.
Зал лық толды. Жастар әшейінде сабылып кетуші еді, бүгін үнсіз, сахнаға жүрекпен сүңгіп кеткен. Аракідік жанарлары жасқа да толып отыр. Шынында сөз жоқ керемет қойылым болды. Соңы ұзақ қошеметтеуге ұласты. 10 минут көрермен тырп етпестен қол соғып, өз ықыластарын білдірді. Осыдан-ақ, спектаклдің жүрекке жете білгенін бағамдауға болатын шығар.
Түркістанның даңқты тарихы көрініс табатын қойылымның түркі жастарын ғылым мен мәдениетке, білімге шақырды. Қоюшы режиссері Шырын Мұстафина, көркемдік жетекшісі Тоғжан Құрманжанқызы, жоба жетекшілері Жанар Темірбекова, Мақпал Жұмабай, ғылыми кеңесшісі Дархан Қыдырәлі.
Актерлік құрамға зор алғыс! Ахмет Ясауи университетінің болашақ актерлері жоғары деңгейде өнер көрсетті. Труппа жетекшісі Мақсат Айтжанов.
Фото: Нахып Шынтеміров
