ЕЛОРДА — ЕЛБАСЫНЫҢ ЕРЕН ЕҢБЕГІНІҢ ЖЕМІСІ

Ертең еліміздің астанасы — Нұр-Сұлтан қаласының туған күні. Дәл осы мерекеде еліміздің дамуына өлшеусіз үлес қосқан Елбасы, Тұңғыш Президент Нұрсұлтан Назарбаевтың туған күні.

Қос мереке қарсаңында Елбасының елге еткен еңбегі мен оның тәуелсіздік жылдарындағы ең айшықты жобаларының бірі – Елорданың өткені мен келешегі туралы орамды ойлар, пайымды пікірлер, лебіздер айтылатыны сөзсіз. Сонымен бірге астанамыздың елордалық «өтілінің» ұлғаюына өлшеусіз үлес қосқан, әлі де қоса түсетін Елбасыға қарата көптеген ақжарма тілектер айтылатыны белгілі. «Көп тілеуі көл» деген. Айтылған тілектер мен жолданған лебіздердің барлығы орындалғай.

Баршаңызды ғажайып мекен – Елорда күнімен құттықтаймын. Осыдан 22 жыл бұрын Арқада бой көтерген әсем қаламыздың болашағы жарқын, келісті келбеті көркейе түссін.

Қазақстандықтардың ортақ мекені – Нұр-Сұлтан қаласының алар асуы, шығар биігі толастамасын. Еуразия жүрегінде орналасқан ару қала еліміздің әкімшілік орталығы ретінде әлеуметтің әлеуетін көтеретін баянды бастамалар мен игі істер бастау алатын бақытты мекен болғай!

Талғат Балтабаев,
«Уақыт» газетінің бас редакторы